డాక్టర్ ఆర్.ఎస్. ప్రవీణ్ కుమార్‌కు భద్రత పునరుద్ధరించాలని పరిగిలో భారీ నిరసన ర్యాలీ

నేటి సాక్షి పరిగి,
(సురేష్ మోత్కూర్ )
డాక్టర్ ఆర్.ఎస్. ప్రవీణ్ కుమార్ గారికి బుల్లెట్‌ప్రూఫ్ వాహనాన్ని పునరుద్ధరించి, పూర్తి స్థాయి భద్రతను కొనసాగించాలని డిమాండ్ చేస్తూ నేడు పరిగి నియోజకవర్గంలో భారీ నిరసన ర్యాలీ నిర్వహించారు. భారత రాష్ట్ర సమితి మాజీ ఎమ్మెల్యే కొప్పుల మహేష్ రెడ్డి ఆదేశాల మేరకు, పరిగి నియోజకవర్గ నాయకులు మంచన్‌పల్లి ఆనంద్ అధ్యక్షతన కొడంగల్ చౌరస్తా నుంచి అంబేద్కర్ విగ్రహం వరకు భారీ ర్యాలీ చేపట్టారు.
ఈ సందర్భంగా పలువురు నాయకులు మాట్లాడుతూ, మాజీ భారత పోలీసు సేవల అధికారి డాక్టర్ ఆర్.ఎస్. ప్రవీణ్ కుమార్ దేశ సేవలో విశిష్ట సేవలందించారని, తన విధి నిర్వహణలో ఎంతో మంది యువతను, నక్సలైట్లను ప్రధాన స్రవంతిలోకి తీసుకురావడంలో కీలక పాత్ర పోషించారని గుర్తు చేశారు. ఆయనకు భద్రతాపరమైన ముప్పులు ఉన్నాయని పేర్కొంటూ, అలాంటి వ్యక్తికి భద్రతను తగ్గించడం, బుల్లెట్‌ప్రూఫ్ వాహనాన్ని తొలగించడం ఆందోళనకరమని తెలిపారు.
ప్రభుత్వ విధానాలను ప్రశ్నిస్తున్నారనే కారణంతో భద్రతను తగ్గించే ప్రయత్నాలు ప్రజాస్వామ్య స్ఫూర్తికి, రాజ్యాంగ విలువలకు విరుద్ధమని నాయకులు ఆరోపించారు. డాక్టర్ ఆర్.ఎస్. ప్రవీణ్ కుమార్ గారికి వెంటనే బుల్లెట్‌ప్రూఫ్ వాహనాన్ని పునరుద్ధరించి, పూర్తి స్థాయి భద్రతను కొనసాగించాలని భారత రాష్ట్ర సమితి నాయకులు, ఆర్.ఎస్.పి. సైన్యం ప్రభుత్వాన్ని డిమాండ్ చేశారు.
ఈ డిమాండ్లను ప్రభుత్వం తక్షణమే అమలు చేయాలని, లేనిపక్షంలో రాష్ట్రవ్యాప్తంగా ప్రజాస్వామ్య పద్ధతుల్లో ఉద్యమాన్ని మరింత ఉధృతం చేస్తామని హెచ్చరించారు.
ఈ కార్యక్రమానికి ముఖ్య అతిథులుగా భారత రాష్ట్ర సమితి రాష్ట్ర అధికార ప్రతినిధి డాక్టర్ విజయ్ ఆర్య క్షత్రియ, భారత రాష్ట్ర సమితి పట్టణ అధ్యక్షుడు అంజయ్య, మాజీ మార్కెట్ కమిటీ చైర్మన్ అంతిగారి సురేందర్, సీనియర్ నాయకులు ప్రవీణ్ రెడ్డి, మాజీ మున్సిపల్ చైర్మన్ ముకుంద్ అశోక్, కౌన్సిలర్లు జాక్ రవి, మీడిగడ్డి శ్రీనివాస్, ఆన్యం అంజనేయులు, నరేష్, మీర్ తాహెర్, ఎదిరే కృష్ణ, పూడూరు మండల నాయకులు దేవనోని గూడెం వెంకటయ్య, మండల ఉపాధ్యక్షుడు రాయిస్ ఖాన్, తొండపల్లి సర్పంచ్ కృష్ణ, చిట్యాల సర్పంచ్ రాజు, సైదుపల్లి రాములు, ఎమ్మార్పీఎస్ మండల అధ్యక్షుడు వెంకట్ రాములు, యువ నాయకుడు రఘువీర్, తాండూరు అరుణ్ రాజ్, చేవెళ్ల రాజమహేంద్ర వర్మ, చందూ మహరాజ్, అశోక్, ఎం. శ్రీనివాస్, ప్రభుదాస్, రవి, నరేష్, యాదిరామ్, నవీన్, నగేష్, జి. రాజు, సురేష్, వాలి, వెంకట్, ప్రసాద్, బి. శ్రీనివాస్, ఆనంద్, శ్రీకాంత్, ఎం. మహేందర్ తదితరులు పాల్గొన్నారు.