హెడ్లైన్ : వికసిత్ భారత్–జీ రామ్ జీ పనులకు శ్రీకారం

నేటి సాక్షి న్యూస్ జూలై 02



పెద్దకడబూరు గ్రామీణ ప్రాంతాల్లో ఉపాధి అవకాశాల విస్తరణతో పాటు మౌలిక సదుపాయాల కల్పనకు కేంద్ర, రాష్ట్ర ప్రభుత్వాలు ప్రాధాన్యత ఇస్తున్న నేపథ్యంలో వికసిత్ భారత్–జీ రామ్ జీ కార్యక్రమం కింద పెద్దకడబూరు గ్రామ శివారులో అభివృద్ధి పనులను ఘనంగా ప్రారంభించారు. ఈ కార్యక్రమంలో ఎంపీడీవో ప్రభావతి దేవి, ఏపీవో చంద్రశేఖర్, రాష్ట్ర రైతు అధికార ప్రతినిధి ఎన్. రమాకాంత్ రెడ్డి, టీడీపీ మండల అధ్యక్షుడు మల్లికార్జున పాల్గొని పనులకు శ్రీకారం చుట్టారు.
ఈ సందర్భంగా అధికారులు, ప్రజాప్రతినిధులు మాట్లాడుతూ గ్రామీణ ప్రాంతాల్లో ఉపాధి అవకాశాలు పెంపొందించడం, పేద కుటుంబాలకు ఆర్థిక భరోసా కల్పించడం, గ్రామాల్లో మౌలిక వసతులను మెరుగుపరచడం ఈ కార్యక్రమం ప్రధాన లక్ష్యమని తెలిపారు. గ్రామీణ కూలీలకు ఏడాదికి 125 రోజుల ఉపాధి కల్పించే విధంగా ప్రభుత్వం చర్యలు చేపట్టిందని, ప్రతి కార్మికుడికి రోజుకు రూ.317 కూలి అందజేయనున్నట్లు వెల్లడించారు.
వికసిత్ భారత్–జీ రామ్ జీ కార్యక్రమం ద్వారా చెరువుల అభివృద్ధి, గ్రామీణ రహదారుల నిర్మాణం, కాలువల శుభ్రత, వర్షపు నీటి సంరక్షణ, పచ్చదనం పెంపు, ఇతర ప్రజాప్రయోజన పనులు చేపట్టనున్నట్లు తెలిపారు. ఈ పనుల ద్వారా గ్రామాల్లో మౌలిక సదుపాయాలు మెరుగుపడటమే కాకుండా స్థానికంగా ఉపాధి అవకాశాలు పెరిగి వలసలను తగ్గించేందుకు దోహదపడుతుందని పేర్కొన్నారు.
రాష్ట్ర రైతు అధికార ప్రతినిధి ఎన్. రమాకాంత్ రెడ్డి మాట్లాడుతూ గ్రామీణాభివృద్ధి, రైతు సంక్షేమం, కూలీల జీవనోపాధి మెరుగుదల లక్ష్యంగా ప్రభుత్వం పలు కార్యక్రమాలను అమలు చేస్తోందన్నారు. ఉపాధి హామీ పథకాన్ని మరింత సమర్థవంతంగా అమలు చేసి ప్రతి అర్హ కుటుంబానికి ఉపాధి కల్పించేందుకు కృషి చేస్తున్నట్లు తెలిపారు. గ్రామాల అభివృద్ధిలో ప్రజల భాగస్వామ్యం కూడా ఎంతో ముఖ్యమని, అందరూ ప్రభుత్వ కార్యక్రమాలను సద్వినియోగం చేసుకోవాలని కోరారు. కార్యక్రమంలో స్థానిక నాయకులు, గ్రామ ప్రజలు, ఉపాధి హామీ సిబ్బంది, కూలీలు తదితరులు పాల్గొన్నారు.