*సర్వే విధుల్లో ఉన్న మహిళా బీఎల్ఓపై సర్పంచ్ దౌర్జన్యం..* అనంతగిరిలో అంగన్వాడిల ధర్నా!

నేటి సాక్షి అనంతగిరి:
సూర్యాపేట జిల్లా అనంతగిరి మండలం పాలవరం తండా గ్రామంలో తీవ్ర కలకలం రేగింది. ప్రభుత్వ ఆదేశాల మేరకు ఎస్‌ఐఆర్ ప్రక్రియలో భాగంగా క్షేత్రస్థాయిలో సర్వే విధులు నిర్వహిస్తున్న మహిళా బీఎల్ఓ విజయపై స్థానిక గ్రామ సర్పంచ్ భూక్యా నారాయణ తీవ్రస్థాయిలో దౌర్జన్యానికి దిగారు. విధి నిర్వహణలో ఉన్న ఆమెను నానా దుర్భాషలాడుతూ, మానసిక వేధింపులకు గురిచేయడమే కాకుండా, ప్రభుత్వ సర్వేను ముందుకు సాగకుండా అడ్డుకునే ప్రయత్నం చేశారు. ఒక బాధ్యతాయుతమైన పదవిలో ఉండి, మహిళా ఉద్యోగిని అని కూడా చూడకుండా సర్పంచ్ ప్రవర్తించిన తీరుపై సర్వత్రా నిరసనలు వ్యక్తమవుతున్నాయి.

*ఎంఆర్ఓ కార్యాలయం ముందు అంగన్వాడిల బైఠాయింపు*


తమ తోటి ఉద్యోగిని విజయపై సర్పంచ్ భూక్యా నారాయణ చేసిన దౌర్జన్యాన్ని నిరసిస్తూ మండలంలోని అంగన్వాడి టీచర్లు, కార్యకర్తలు పెద్ద ఎత్తున తరలివచ్చారు. అనంతగిరి మండల తహశీల్దార్ కార్యాలయం ముందు వారు ఉధృత నిరసన చేపట్టారు. కార్యాలయం వద్ద బైఠాయించి సర్పంచ్‌కు వ్యతిరేకంగా పెద్ద పెట్టున నినాదాలు చేశారు. మహిళా ఉద్యోగులకు రక్షణ కల్పించడంలో ప్రభుత్వం విఫలమైతే ఊరుకునేది లేదని హెచ్చరించారు. బాధితురాలికి సర్పంచ్ బహిరంగంగా క్షమాపణ చెప్పాలని, ఆయనపై తక్షణమే చట్టరీత్యా కఠిన చర్యలు తీసుకోవాలని డిమాండ్ చేశారు.


*సీఐటీయూ పూర్తి మద్దతు*


అంగన్వాడి టీచర్లు చేపట్టిన ఈ న్యాయమైన పోరాటానికి సీఐటీయూ జిల్లా కమిటీ పూర్తి మద్దతు ప్రకటించింది. ఈ నిరసన కార్యక్రమంలో సీఐటీయూ జిల్లా నాయకులు సోమపంగు రాధాక్రిష్ణ స్వయంగా పాల్గొని ప్రసంగించారు. ప్రభుత్వ ఉద్యోగులు, ముఖ్యంగా మహిళలు క్షేత్రస్థాయిలో విధులు నిర్వహిస్తుంటే ఇలాంటి వేధింపులకు గురిచేయడం దుర్మార్గమైన చర్య అని ఆయన మండిపడ్డారు. రాజకీయ బలంతో అడ్డువచ్చే ఇలాంటి నాయకులపై క్రిమినల్ కేసులు నమోదు చేయాలని డిమాండ్ చేశారు.

*రంగంలోకి దిగిన ఆర్డీఓ.. చర్యలకు హామీ!*

ఆందోళన ఉధృతంగా మారడంతో విషయం తెలుసుకున్న కోదాడ ఆర్డీఓ సూర్యనారాయణ రావు తక్షణమే అనంతగిరి ఎంఆర్ఓ కార్యాలయానికి చేరుకున్నారు. నిరసనకారులతో ఆయన మాట్లాడి, ఘటనకు సంబంధించిన వివరాలను అడిగి తెలుసుకున్నారు. విధి నిర్వహణలో ఉన్న ప్రభుత్వ ఉద్యోగులపై దౌర్జన్యం చేయడం చట్టరీత్యా నేరమని ఆయన స్పష్టం చేశారు. బాధ్యులైన సర్పంచ్ భూక్యా నారాయణపై చట్టప్రకారం కఠిన చర్యలు తీసుకుంటామని ఆర్డీఓ రాతపూర్వకమైన హామీ ఇచ్చారు. ఉన్నతాధికారి నుండి స్పష్టమైన హామీ లభించడంతో అంగన్వాడి టీచర్లు, నాయకులు తమ నిరసనను తాత్కాలికంగా విరమించారు.